2012-05-08

رمية زهر

افكار عايزاك تطلع ليها..
و تحب انك تفضل تحت..
و افكار نفسك تعتر فيها..
و عمرك من غيرها ما ارتحت..!
و افكار عمرنا ما بننساها..
مهما حاولنا..
و افكار عمرنا ما بنلقاها..
رافضة تجيلنا..
مع ان ما بينا و ما بينها..
 مسافه... يجي شبرين...
لكن لاجل النحس راكبنا..
تلقانا باصين في اتجاهين..
و غريبة ما بينا ما فيش بعد..!
لكن واقفين ضهر في ضهر..
و عشان وشنا يبقي لبعض...
لازم حظ في رمية زهر..
يا ف ثانية.....تاخد الدور مارس !
و تقوم قاشش كل الفيش..
يا هتبقي اتعلمت الدرس..!
يا بتكسب كله...يا مفيش..
مع ذلك عمري ما بتنكد..
علي حاجة عايزها ما بيتجيش...
ده لأني كده كده متأكد...
انها لو يوم مكتوبة ليا..
جايز هستناها شوية...
و مع غيري عمرها ما تعيش..

2012-05-05

مجاش في بالك

الحياة مجموعة اسئلة...
و ميت علامة استفهام
و باجابتك انت مكملة...
و اخر تمام...
و المشكلة...
الاسئلة دي كلها...
مكتوبة بالقلم الرصاص..
فلما تشوفها..تحلها..
و تقول خلاص..
الحل سهل..
أكيد اجابتي انا كمان..
هتبقي مكتوبة برصاص..
وبسرعة جدا راح تحل.... 
وعمرك ما تخاف ملغلط !
و بسرعة برضو راح تمل...!
و كأن حلك شئ بسيط....!
و مجاش فبالك يا عبيط...
أنك ف سؤال واحد تخاف... ؟
أو تعيد تاني حلهم ؟
مجاش في بالك مرة واحدة..
أن اجاباتك كلهم...
م الأصل.... مكتوبين بجاف ّ؟!


2012-05-03

كشكول الحياة

لو اللي جاي يتشاف...
أو اللي جاي يتحس
لو كنت عارف بس...
ان عبوس الوقت..
مسيرة يتسايس...
و ان النجاح جايز...
جايز ماكنتش أخاف....
لو اللي جاي معروف..
اطرح سنين الخوف...
يتبقي لك كم شهر...
الساعة فيه بألوف...
و الباقي يسوي بلاش..
يتبقي ربع العمر..!
و كفاية ده يتعاش..
يكفيني ربع العمر...
جايز ابان مجنون...!
يكفيني بس الربع..
لكن يكون مضمون..
لو اللي جاي يتشاف.. !
كان زماتي عرفت....
ان السعادة و الفرص
مش موجودين علي طول 
و ان الحياة كشكول...
سطور تاخد سنين...
متسجلين و خلاص ....!
و الكلمتين المكتوبين..
مش مكتوبين برصاص !
لو كنت شفت الجاي...
عمري ما كنت هخاف
لو كنت شفت ازاي..
ان السطور وقتها
مش مكتوبين بالجاف..
لو اللي جاي يتشاف !

2012-03-16

طبق كشري



تملي غريب
و متخلبط
و من صغري
ساعات ببقي
كده في حالي
و ساعات ببقي
كتير حشري
اوقات ببقي 
وحيد جدا
و ساعات اكتر
بكون عشري
من الاخر
ان جواياي تركيبة
تشبه كتير
طبق كشري..

2011-12-25

الكلمة

اياك تستهون بالكلمة
و بساطتها تكون مخدوع
هي الكلمة تحرر أمة
و هي الكلمة تهز جموع
و تقول كلمة تزيح الغمة
و تنور في الضلمة شموع
قولي لكلمه يساوي حرية
ملعون ابو كلمة ممنوع
صدق هتافي يهز الدنيا
مش راح يقفل بقي الجوع
فاقد حرية ميعيشي
و ميتنفسشي المقموع
و الكلمة الحلوة مش حكمة
مش بضرورة كلام مسجوع
قيمة الكلمة احساسك بيها
مش لازم برضو تغنيها
بس الشرط اللازم فيها
لما تقولها تحس خشوع
فرغ ألمك جوة الكلمة
عمر سكات ما يفيد موجوع
كلمة تزلزل عرش الظالم
ريح بتهز جبال و قلوع
كلمة توصل ييجي ميت معني
كلمة تقربنا...تجمعنا
كلمة نقولها الناس تسمعنا
كلمة تفهم ميت موضوع
كلمة تقولهىا و لو فيها موتك
حارب ضعفك و اقتل خوفك
و لو متقدر يخلص عمرك
يبقي تموت و الراس مرفوع

2011-10-08

ذكريات


شوية ذكريات حلوين....
بيهم عايشين ....
و بالعافيه ملصمينهم....
وبالعافيه احنا...
متلصمين....
زي لحظة ما اجاوب...
ندا الصاحب ذا قال مين...
يا مين يحافظ عليا...
و يبقي علي سري امين..
مين اللي لما الدنيا تهجرني..
يشلني في عين...
و عينه التانيه راح تبكي...
ده مين...
و حاجات كتير...
شكلت معالم الضحكة...
علي وجهي الحزين....
شوية ذكريات ماسكين في بعضهم....
و متبتين....
لاجل ما تلاقي الضرورة من العيشه.....
لاجل ما تعيش انت ...
يا قلبي  يا مسكين....



2011-09-26

بكره مسيره هيبقي امبارح


زنقة و هيصه و موقف صعب
و مشكله مالهاش اي ملامح
هوجه و دوخه و قبضة قلب
وكونها هتتحل ده مش واضح
سهله و راح تفرج عن قرب
عيش اللحظه و خليك ناصح
افرح و املا حياتك حب
اضحك,هزر,حب,و سامح
هي ثواني مسيرها تعدي
و بكره مسيره هيبقي امبارح